با زه‌مه‌نێك بۆ گه‌ڕانه‌وه قه‌رزكه‌ین
مامۆستا عیسا حوسێن : سه‌رپه‌رشتیاری پسپۆریی
زمانی كوردی له په‌روه‌رده‌ی ده‌شتی هه‌ولێر
زمانی كوردی له په‌روه‌رده‌ی ده‌شتی هه‌ولێر
كه هاتی . . . هه‌واڵێك بنێره تا چیتر چیا پیاسه‌یه‌ك له‌گه‌ڵ حه‌رف نه‌كاو
به باڵای وشه‌دا پێنه‌كه‌نێ
پارچه‌یه‌ك له ئاسمان تووڕ هه‌ڵنه‌داو
تاریكی له زیندانی دۆڵێكدا سندم نه‌كا
رێ له سه‌فه‌ری ئاو نه‌گرێ و
مه‌تاره‌كه‌ی كه‌مه‌ری پڕاوپڕ نه‌كا له سه‌راب
كه‌هاتی . . . هه‌واڵێك بنێره
تا چیتر . . . قه‌ڵا ناوله‌پی خۆی نه‌خوێنێته‌وه
كه‌ندێناوه عه‌شقی پشده‌ر نه‌بێ
چاوه‌كانی مناره‌ش
نه‌درێنه شه‌مشه‌مه‌كوێره‌كانی دنیا
كه‌هاتی . . . هه‌واڵێك بنێره
تا چیتر . . . شیعر چاوت بۆ نه‌گێرێ
عه‌شق نه‌چێته‌وه سنووره‌كانی بێهووده‌یی
رۆح نه‌چێته‌وه كه‌ناره‌كانی توانه‌وه
كه هاتی . . . هه‌واڵێك بنێره
تا چیتر . . . زه‌وی به ترپه‌ی دڵی ئاسمان بێدار نه‌بێته‌وه
تا چیتر له زیندووبوونه‌وه‌ی ئاودا
مردن نه‌بێته میوانی باران
تا چیتر . . . منداڵبوونه‌وه‌ی گه‌ردوون
كار له پیربوونی ره‌نگ و
ترسانی مانگ نه‌كا
تا چیتر . . . پیاسه‌ی شاخ و
له‌خه‌و رابوونی به‌رد
هه‌ور ژێر پێ نه‌خا
تا چیتر . . . هه‌ستانه سه‌ر پێی شه‌قام
گه‌وره‌یی نه‌داته ده‌ستی غوربه‌ت
ونبوون نه‌كاته هاورێی خه‌یاڵ
كه‌هاتی هه‌واڵێك بنێره
تاچیتر . . . عه‌شق له‌سه جوانترین زبڵدان و
خۆشترین جێگه له دۆزه‌خ و
پیسترین بۆن له فیرده‌وس
نه‌دره‌وشێ
كه‌هاتی . . . هه‌واڵێك بنێره
تا چیتر . . . زه‌مه‌ن له رۆح نه‌دا
سنووریش رۆحی لای من جێنه‌هێڵێ و
په‌نجه شكاوه‌كانی له هه‌ریر
نه‌دا به خانزادی سۆران و
جه‌سته‌ی له سلێمانی
نه‌به‌خشێته شێخ مه‌حمود
هه‌ڵوێستیش نه‌به‌خشێته سه‌راب
كه‌هاتی . . . هه‌واڵێك بنێره
تا چیتر . . . سنوور له‌گه‌ڵمان جاری جه‌نگ نه‌دا
ئێره نه‌دا به زریان و
خۆی له‌سه‌ر ئه‌تڵه‌سدا نه‌سرێته‌وه
تا چیتر . . . سنوور په‌یكه‌ری خۆی له سوور نۆشۆرێ و
له بیابانێكی زه‌رد هه‌ڵگه‌راویشدا
قردێله‌ی كه‌سك كه‌سك
له‌قژه داوداوه خه‌ناویه‌كه‌ی نه‌دا
كه‌هاتی . . . ته‌نیا
ته‌نیا هه‌واڵێك بنێره
6/12/2001 هه‌ولێر
ليست هناك تعليقات:
إرسال تعليق